መግቢያ፡ ከሜካፕ በስተጀርባ ያለው እውነት

ውበት ለሞት ምክንያት ሊሆን እንደሚችል አስበህ ታውቃለህ / ታውቂለሽን? ዛሬ በመስተዋት ፊት ቆመን ፊታችንን ስናሳምር፣ ሜካፕ (Make-up) ስንቀባ ወይም ስለ መልካችን እጅጉን ስንጨነቅ፣ ስለ ቅድስት አርሴማ (Hripsime) ታሪክ ውል ብሎን ያውቅ ይሆን? ተፈጥሮ የሰጠቻት ወደር የለሽ ውበት ለስደት፣ ለመከራና ለሞት እንደዳረጋትስ ታውቃለህ/ታውቂያለሽ? 

ብዙዎቻችን ውበትን እንደ በረከትና እንደ እድል እንቆጥረዋለን። ዓለም “ቆንጆ ከሆንሽ ዓለምን ትገዢያለሽ” ትለናለች። የቅድስት አርሴማ ታሪክ ግን ከዚህ የተለየ ነው። እርሷ በዘመኗ ከነበሩ ሴቶች ሁሉ ተለይታ በውበቷ የምታበራ፣ የሮምንም ሆነ የአርመንን ነገሥታት ልብ ያንበረከከች ድንቅ ፍጥረት ነበረች። ነገር ግን ይህ ውበቷ ሰላም አልሰጣትም፤ ይልቁንም የህይወቷ ፈተና ሆነ። ዛሬ ብዙ ሰው ስለ ውበቱ አብዝቶ ይጨነቃል ፣  ቅድስት አርሴማ ግን ስለ ንጽህናዋ ስትል ያማረ ዓይኗቿን ለጉጠት፣ የተዋበ ሰውነቷን ለሰይፍ አሳልፋ ሰጠች። ውበቷ ለኃጢአት ምክንያት ከሚሆንባት ይልቅ፣ በሰማዕትነት ለክርስቶስ መቅረብን መረጠች። ለመሆኑ ይህች ዓለምን በውበቷ  ያስደነቀች፣ ነገር ግን ዓለምን የናቀች “የክርስቶስ ሙሽራ” ማን ናት?

፩. ስዕለታዊ ውልደትና የቅድስና አስተዳደግ 
የዚህች ብፅዕት እናት ታሪክ የሚጀምረው በታላቋ ሮም ነው። ወላጆቿ ቅዱስ ቴዎድሮስ እና ቅድስት አትናሲያ ይባላሉ። እነዚህ ቅዱሳን በሃይማኖት የጸኑና እግዚአብሔርን የሚፈሩ ቢሆኑም፣ ልጅ በማጣት ለረጅም ጊዜ አዝነው ነበር። እናቷ ቅድስት አትናሲያ “ፍሬ የሌለው ከንቱ አታድርገኝ” ብላ በምሬት ወደ ፈጣሪዋ አለቀሰች። እግዚአብሔርም ጸሎታቸውን ሰምቶ፣ መልኳ እንደ ፀሐይ የሚያበራ፣ ግብረ-ገብነቷ የተመሰገነ ድንቅ ልጅ ሰጣቸው። 
አርሴማ በቤተ ክርስቲያን ሥርዓት አደገች፤ ትምህርትን ከወላጆቿ ቀሰመች፤ በተለይም የቅድስናን ሕይወት ወዳድ ነበረች። ለአቅመ ሄዋን ስትደርስ በውበቷ አቻ አልነበራትም፤ እርሷ ግን ይህንን ሥጋዊ ውበት ንቃ ራሷን ለሰማያዊው ሙሽራ ለክርስቶስ ለመስጠት ወሰነች።

፪. የውበት ፈተናና የስደት ጉዞ 
በወቅቱ የሮም ንጉሥ የነበረው ዲዮቅልጥያኖስ፣ ለጋብቻ የምትሆነውን ቆንጆ ሴት እንዲፈልጉለት አዋጅ አወጣ። መልእክተኞቹም በገዳም ውስጥ ተወስና የነበረችውን ቅድስት አርሴማን አገኟት። ሥዕሏን አይቶ በውበቷ የተማረከው ንጉሡ ሊያገባት ቢፈልግም፣ እርሷ ግን “ለዚህ ዓለም ኃላፊ ንጉሥ አልታጭም” በሚል ጽናት ከ27 ጓደኞቿ (ደናግል) እና ከእመ-ምኔቷ ቅድስት አጋታ ጋር በመሆን በድብቅ ተሰደደች። 
እግዚአብሔርም እየመራቸው ከአረማዊው ንጉሥ አምልጠው ወደ አርመን ሀገር ገቡ። ይሁንና ፈተናው እዚህ ላይ አላበቃም ነበር። የአርመን ንጉሥ ድርጣድስ (Tiridates)፣ ከዲዮቅልጥያኖስ በተላከለት መልእክት መሰረት አሰሳ አድርጎ አገኛቸው። እርሱም በተራው የአርሴማን ውበት አይቶ በፍትወት ተቃጠለ፤ ለሮሙ ንጉሥ መላኩን ትቶ ለራሱ ሊያገባት ፈለገ። አስቡት… ሁለት ታላላቅ የዓለም ነገሥታት ስለ ውበቷ ሲል ተንበርክከውላታል። እርሷ ግን የመረጠችው የንግሥናን ክብር ሳይሆን የሰማዕትነትን ሞት ነበር። 

፫. ታላቁ ተጋድሎ፡ መንፈስ ሲያሸንፍ 
የቅድስት አርሴማ ታሪክ ወደር የለሽ የሚሆነው እዚህ ላይ ነው። ንጉሥ ድርጣድስ በስጦታና በውዳሴ ሊያታልላት ሞከረ፤ አልሆን ሲለው ግን በኃይል ሊወስዳት ፈለገ። ቅድስት አርሴማ ግን ሴትነቷንና ለስላሳ ተፈጥሮዋን ወደ ጎን በመተው፣ በመንፈስ ቅዱስ ኃይል ተሞልታ ከንጉሡ ጋር ታገለች። ያንን በጦርነት የጎለመሰና በሰውነት ግዝፈቱ የሚታወቅ ንጉሥ፣ ይህች ወጣት ሴት ከመሬት ጋር አጋጨችው። ንጉሡ በሠራዊቱና በመኳንንቱ ፊት በሴት ልጅ በመሸነፉ እጅግ አፈረ። ይህ ድል አርሴማ በሥጋዊ ጉልበት ሳይሆን በመንፈሳዊ ጥንካሬ የጠላትን ኃይል ያሸነፈችበት ጉልህ ምስክርነት ነው። 

፬. መራራው ሰማዕትነትና የክብር አክሊል 
ንጉሡ ስልቱን ወደ ስነ-ልቦናዊ ጦርነት ቀየረ። አርሴማን ከመጉዳቱ በፊት፣ አብረዋት የተሰደዱትን 27 ጓደኞቿን በፊቷ አስገደላቸው። ይህ ለአርሴማ ከሞት በላይ የሆነ ህመም ነበር። ንጉሡ ይህንን ያደረገው “ለእኔ እሺ ብትይ ኖሮ እነዚህ ሁሉ ይኖሩ ነበር” የሚል የጥፋተኝነት ስሜት በውስጧ ለመፍጠር ነበር። ነገር ግን አርሴማ አልተሸነፈችም። በእመ-ምኔቷ ምክር ጸንታ “ጓደኞቼ አልሞቱም፤ ቀድመውኝ ወደ ሰማይ ገቡ እንጂ” በማለት እንደ ተጎጂ ሳይሆን እንደ ድል አድራጊ ቆመች። 
ከዚህ በኋላ ጨካኙ ንጉሥ ወደ አርሴማ አካል ዞረ። በንዴት ያበደው ንጉሥ፣ ያንን ሲመኙት የነበረውን ውብ አካል በጭካኔ አተላተለው። እውነትን የመሰከረ ምላሷን አስቆረጠ፤ ለክፉ ምኞት ምክንያት ሆኑብኝ ያለችውን ሁለቱን ጡቶቿን አስቆረጠ፤ ንጉሡን ማየት የጠሉትን ዓይኖቿን አወጣ። አርሴማ ግን ይህ ሁሉ ሲሆን “አይኔ ጠፋ፣ አካሌ ጎደለ” ብላ አላለቀሰችም። ይልቁንም ያ በውበቱ ዓለምን ያስጨነቀ አካሏ ሲፈርስ፣ የውስጥ ነፍሷ ግን እያበራ ነበር። በመጨረሻም በመስከረም 29 ቀን አንገቷን በሰይፍ ተቆርጣ የሰማዕትነትን ክብር ተቀዳጃች። 

፭. የድል ፍሬና ቃል ኪዳን 
የቅድስት አርሴማ ደም በከንቱ ፈሶ አልቀረም። ከሰማዕትነቷ በኋላ ንጉሡ ድርጣድስና መኳንንቱ ባደረጉት ግፍ ተቀጥተው ወደ አውሬነት (እሪያነት) ተቀየሩ። ይህ ቅጣት የንስሐ ጥሪ ነበር። በመጨረሻም የንጉሡ እህት በራዕይ ተነግሯት፣ ለ15 ዓመታት ጉድጓድ ውስጥ ተጥሎ የነበረውን ቅዱስ ጎርጎርዮስን (St. Gregory the Illuminator) አወጡት። እርሱም የቅድስት አርሴማንና የጓደኞቿን አጽም ሰብስቦ በክብር አኖረ፤ ንጉሡንም ፈወሰ። በዚህም ምክንያት መላው የአርመን ሕዝብ ወደ ክርስትና ሊመለስ ችሏል። ጌታችንም ለቅድስት አርሴማ ቃል ኪዳን ገብቶላታል፤

“ስምሽን የጠራ፣ መታሰቢያሽን ያደረገ፣ በገድልሽ የተማጸነን ሁሉ እምርልሻለሁ” ብሏታል።